Северна Кореја ја осуди одлуката на САД да продаде ракети на Јужна Кореја и најави силен и непосреден одговор на непријателските потези на Вашингтон. Овие пораки ги пренесе севернокорејската државна агенција КЦНА, според Ројтерс.
Реакцијата од Пјонгјанг доаѓа во време кога американскиот претседател Доналд Трамп повторно го поканува севернокорејскиот лидер Ким Џонг Ун на состанок. Трамп претходно овој месец изјави дека Ким одговорил на неговиот предлог, но аналитичарите проценуваат дека официјален Пјонгјанг не покажува голем интерес за продолжување на преговорите.
Обвинувања за непријателски дејствија
„Уште еднаш се уверивме во отворено непријателскиот став на САД кон ДНРК“, изјави портпаролот на министерството во соопштение објавено од агенцијата КЦНА. ДНРК е кратенка за Демократска Народна Република Кореја, официјалното име на Северна Кореја.
Реакцијата се однесува на одлуката на американскиот Стејт департмент за можна продажба на тактички ракети AIM-9X Sidewinder и придружна опрема на Јужна Кореја. Договорот од 125 милиони долари (107,25 милиони евра) Пјонгјанг го смета за нова закана за неговата безбедност.
Северна Кореја, исто така, го критикуваше планот на САД за финансирање на документацијата за човекови права и собирањето разузнавачки информации за земјата, велејќи дека тоа е дел од кампањата за дестабилизација на нејзиниот општествен систем.
Предупредување за зајакнувањето на Сеул
Портпаролот истакна дека Вашингтон веќе одобрил продажба на разни системи за оружје на Јужна Кореја оваа година, вклучувајќи напредни тактички ракети, поморски и напаѓачки хеликоптери и прецизни бомби. Тој додаде дека САД на тој начин го охрабруваат Сеул да ги зајакне своите борбени капацитети.
„Со оглед на забрзаната воена интеграција од САД и нивните сојузници во Азиско-пацифичкиот регион, не можеме да го игнорираме негативното влијание на продажбата на оружје од САД на Република Кореја врз регионалната безбедност“, додаде портпаролот. Тој заклучи велејќи дека Северна Кореја е свесна за ваквите закани и ќе одговори „сериозно, веднаш и силно“ на „непријателски акти во различни сфери“.
