Поранешниот италијански премиер и лидер на партијата „Да живее Италија“, Матео Ренци, во Фиренца изјави дека претседателката на Европската комисија, Урсула фон дер Лајен, не треба да биде реизбрана на таа функција.

„Урсула фон дер Лајен, според мене, не треба да биде реизбрана. Ќе ве замолам да не гласате за неа, туку да гласате за лидер, а не за следбеник на идеологии“, истакна Ренци во последниот говор на последниот ден од конвенцијата „Да живее Италија“ во Фиренца.

Ренци рече и дека унгарскиот премиер Виктор Орбан треба да престане да добива европски пари доколку не сака да ги почитува правилата на ЕУ, пренесе „Република“.

„Ако Орбан не сака да се придржува до правилата на ЕУ, има целосно право да го стори тоа, но ако сака да не ги почитува правилата за владеење на правото, нека престане да зема европски и италијански пари. Италијанските даночни обврзници нема да платат за вашата изборна кампања, драг Виктор“, изјави поранешниот премиер на Италија.

Поранешната партнерка на покојниот италијански политичар Силвио Берлускони, Франческа Паскал, која присуствуваше на конвенцијата, оцени дека Ренци е единствениот лидер на теренот и дека го продолжува проектот што го започна Берлускони.

„Убедена сум во упорноста, силата, политичката страст и ентузијазам на Матео Ренци, што е тешко да се најде кај политичките лидери. Денес тоа го препознавам само кај него“, изјави таа.

Таа исто така додаде дека Ренци е една од политичките фигури кои Берлускони најмногу ги сакал и кого „секогаш го сметал за политички гениј“.