Рускиот претседател, Владимир Путин, ги предупреди учениците за опасностите од пушењето, посочувајќи дека електронските цигари му штетат на репродуктивното здравје и можат да доведат до неплодност.

„Потребно е да се разбере до што водат лошите навики. Многу луѓе, особено младите, не размислуваат за тоа. Се чини дека е модерно, дека е кул да се консумираат електронски цигари“, им рекол Путин на учениците во училиште во Кизил, град недалеку од руската граница со Монголија.

„Кај младите репродуктивната функција е намалена и кај момчињата и кај девојчињата, односно се намалува можноста за раѓање деца во иднина“, се обидел да им објасни Путин на насобраните ученици, пренесува „Политико“.

Рускиот лидер зборувал и за мотоциклите, опишувајќи ги како „нестабилно“ превозно средство.

„Заштедете за автомобил, подобро е за мама и тато“, им рекол тој на учениците. Путин советувал како дел од лекцијата со наслов „Разговор за важни работи“.

Путин не е единствениот кој неодамна се спротивстави на електронските цигари. Во Велика Британија, новата лабуристичка влада, исто така, најави дека ќе ги разгледа предлозите за ограничување на продажбата и снабдувањето со електронски цигари. Плановите се очекува да бидат обелоденети откако британските пратеници ќе се вратат од летниот распуст.