Проблемите со опремата за дупчење ги спречија спасувачките служби да ги извлечат работниците од тунелот што се урна на 12 ноември во индиската држава Утараханд, пишува Ројтерс.

Обидите да се извлечат работниците, со дупчење дупки низ карпи и метал со цевка за евакуација беа прекинати откако беа откриени проблеми со опремата.

Остануваат 15 метри копање до местото каде што работниците се заглавени, а радарот кој продира под земја покажува дека нема метални пречки во следните пет метри длабочина, изјави Башкар Кулбе, еден од водачите на спасувачката екипа, додавајќи дека очекува копањето да продолжи во 11:30 часот по локално време.

Управата соопшти дека вториот план за евакуација вклучува вертикално дупчење од врвот на ридот и дека опремата се подготвува.

Работниците, заробени под урнатините 12 дена, имаат пристап до светлина, вода, кислород и храна преку дупките за ендоскоп, издупчени оваа недела, велат официјалните лица.

Медицинските работници се на терен и доставуваат лекови и психијатриска помош.

Надлежните не ја објаснија причината за уривањето, но се знае дека регионот е подложен на земјотреси, одрони и поплави, пренесува Танјуг.