– Во Узбекистан денеска се одржуваат предвремени претседателски избори. Изборите ги распиша претседателот Шавкат Мирзијоев, чија победа изгледа сигурна.

Избирачките места беа отворени во 8 часот, а ќе бидат затворени во 20 часот. Право на глас имаат околу 20 милиони луѓе.

Узбекистанскиот претседател, кој е на власт од 2016 година, распиша предвремени избори за да ја консолидира својата моќ. Мирзијоев, кој го наследи долгогодишниот авторитарен шеф на државата Ислам Каримов по неговата смрт, се соочува со практично непознати ривали кои практично немаат никакви шанси.

Мирзијоев, кој се смета себеси за реформатор, ги распиша предвремените избори по референдумот на 30 април на кој граѓаните на земјата ги одобрија со мнозинство од повеќе од 90 отсто уставните измени со кои мандатот на шефот на државата е продолжен од пет на седум години. Мирзијоев ќе има право на два мандати. Ова теоретски ќе му овозможи на претседателот, кој на 24 јули ќе наполни 66 години, да остане на власт до 2037 година.