Поранешен советник на украинскиот претседател предупреди дека силите на Киев нема да можат да го задржат Авдивка, град во областа Доњецк каде што се водат жестоки борби. До јануари оваа година, Олексиј Арестовиќ беше советник за комуникации на украинскиот претседател Володимир Зеленски, пишува Њусвик.

Тој поднесе оставка откако се соочи со критики за тоа дека рускиот проектил што погоди зграда во Днипро на 14 јануари беше соборен од украинските сили за воздушна одбрана. Откако украинските пратеници побараа негово отстранување, Арестович се извини за неговите изјави, но оттогаш ја критикуваше контраофанзивата на Украина која започна во јуни.

Овој месец Русија започна голема офанзива на Авдивка, која е на линијата на фронтот во источна Украина и се смета за порта кон градот Доњецк. Инаку, Доњецк е под руска окупација од 2014 година. Борбите околу Авдивка се интензивираа во последните денови, а британското воено разузнавање објави дека Русите трпат големи загуби.

Сепак, во интервјуто објавено од руски канал на Телеграм, Арестовиќ изрази песимистички став. „Мојата прогноза е тажна. Сигурен сум дека постои голема веројатност да ја загубиме Авдивка. Ситуацијата е трагична. Целата армија знае дека војниците од јужниот фронт се префрлени во Авдивка“, изјави тој.

„Ова значи збогум на јужната офанзива. Русите повлекуваат три војски од околината на Купјанск во Авдивка и разбираме дека најверојатно ќе се пробијат“, додаде тој. Неговата позиција е во спротивност со размислувањата на некои западни аналитичари кои веруваа дека Украина може да ја задржи Авдивка бидејќи руските сили претрпеа големи загуби во опрема и војници.

Институтот за проучување на војната, тинк-тенк со седиште во САД, цитираше воен блогер поврзан со Кремљ кој вели дека тешкотиите може да придонесат за „позиционен ќор-сокак“ на руските офанзивни операции. Арестович смета дека доколку Авдивка биде заробена, тоа би било „пресуда за системот“ на украинската армија поради загубата на „седмиот град по ред“.

Арестовиќ нагласи дека украинските воени успеси секогаш се фалат и се зборува за руски загуби, „но секогаш завршува на ист начин“.

Иако украинските сили го освоија Херсон минатиот ноември, контраофанзивата летово не ги оправда очекувањата.