Американскиот министер за одбрана Пит Хегсет нареди итно суспендирање на сите планирани медицински процедури за транзиција на полот за членовите на американската војска во меморандум објавен минатата недела.

Меморандумот, исто така, формално го паузираше процесот на приклучување на трансродовите лица во војската, по извршната наредба на американскиот претседател Доналд Трамп за забрана на трансродовите лица да служат во војска.

„Уредбата стапува во сила веднаш. Сите нови приеми во војската на луѓе со историја на родова дисфорија се паузирани, а сите непланирани, закажани или планирани медицински процедури поврзани со потврдување или овозможување родова транзиција за припадниците на воената служба се паузирани“, пишува во меморандумот потпишан на 7 февруари, пренесува Си-Ен-Ен.

Прекинот во медицинските процедури вклучува „иницирана хормонска терапија за потврдување на полот“.

Меморандумот следи по извршната наредба на Трамп од минатиот месец, во која се наведува дека „медицинските, хируршките и менталните ограничувања“ на трансродовите лица не се во согласност со потребите на војската.

Исто така, се наведува дека нивната родова транзиција е „во конфликт со посветеноста на војниците на чесен, вистинит и дисциплиниран начин на живот“ и дека „тоа не е во согласност со понизноста и несебичноста што се бара од припадниците на армијата“, пренесува Танјуг.

Во меморандумот на Хегсет се наведува дека лицата „со родова дисфорија доброволно се пријавиле да и служат на нашата земја и ќе бидат третирани со достоинство и почит“.