Портпаролот на кинеското Министерство за надворешни работи, Гуо Џиакун, изјави дека Пекинг ја смета американската блокада на иранските пристаништа за „опасна и неодговорна“.

Според него, и покрај привременото примирје договорено од релевантните страни, САД го зголемија военото распоредување и воведоа насочена блокада, правејќи потег што може да го влоши конфликтот, да го поткопа кревкото примирје и дополнително да ја загрози безбедноста на пловидбата низ теснецот.

„Кина ги повикува сите страни да го почитуваат прекинот на огнот, да останат посветени на дијалогот и мировните разговори, да преземат практични чекори за намалување на регионалните тензии и да го вратат нормалниот премин низ теснецот што е можно поскоро“, рече тој, според Ројтерс.

Вчера во 16:00 часот по средноевропско време, САД воспоставија блокада на Ормускиот теснец, што се однесува на сите бродови што влегуваат или излегуваат од иранските пристаништа и крајбрежните области, вклучувајќи ги и пристаништата во Арапскиот и Оманскиот Залив.

Американскиот претседател Доналд Трамп се закани дека секој ирански брод, ако се приближи до американската блокада на Ормускиот теснец, ќе биде уништен, пренесува Танјуг.