Израелски воени авиони рано утринава бомбардираа области во близина на три болници во Појасот Газа, јавуваат палестинските медиуми, но засега не е јасно дали самите болници претрпеле штета.

Израелската војска веднаш не ги коментираше извештаите, според кои Израел го извршил нападот во близина на болниците Шифа и Ал Кудс во градот Газа и во близина на индонезиската болница, на север од енклавата.

Директорот на индонезиската болница изјави за Ал Џезира дека израелскиот бомбашки напад предизвикал „сериозна штета и повреди“, без да даде детали.

Ројтерс не можеше веднаш да ги потврди извештаите. Нема информации за штети или повредени во близина на другите две болници.

Палестинската Црвена полумесечина на 14 октомври објави дека Израел им наредил да ја евакуираат болницата Ал Кудс. Групата соопшти дека не е можно да се преместат болните и ранетите.