Унгарскиот  премиер Виктор Орбан се заканува дека ќе стави вето на новиот седумгодишен буџет на Европската унија доколку Брисел не ги деблокира европските фондови за Унгарија.

Орбан оваа закана ја упати во интервју за унгарското државно радио. За одобрување на буџетот на ЕУ потребна е согласност од сите земји-членки.

„Можам со сигурност да кажам дека нема да придонесам за ова доколку средствата кои сè уште и се блокирани на Унгарија не се обезбедат во новиот долгорочен буџет“, рече тој.

Орбан во минатото неколку пати вршеше притисок врз Европската комисија со своите закани за вето. Комисијата сè уште блокира речиси 12 милијарди евра средства наменети за Унгарија, како и милијарди евра помош во борбата против коронавирусот.

Брисел ќе ја укине блокадата само кога Унгарија ќе спроведе дополнителни реформи за зајакнување на владеењето на правото.

Преговорите за новиот повеќегодишен буџет на ЕУ за периодот од 2028 до 2035 година треба да започнат во средината на 2025 година.