Министерството за одбрана на Тајван објави дека открило осум кинески борбени авиони и еден балон кои ја преминале централната линија на Тајванскиот теснец во текот на изминатите 24 часа.

Министерството прецизираше дека кинеските борбени авиони Ј-10, Ј-11 и Ј-16 ја преминале централната линија на север и во центарот на теснецот. Тајван испрати свои сили за надзор, соопшти Министерството.

Централната линија некогаш служеше како неофицијална бариера меѓу двете страни, но сега кинески авиони редовно летаат над неа.

Министерството, исто така, објави дека е забележан уште еден кинески балон во теснецот, последен во серијата за кои Тајван вели дека најверојатно се наменети за следење на времето, управуван од ветровите што преовладуваат во овој период од годината.

Тајван, кој Кина го смета за своја територија, постојано се жалеше на кинеската воена активност околу островот во последните четири години.

Кина ги засилува своите мисии во близина на Тајван како што се приближуваат претседателските и парламентарните избори на островот на 13 јануари.