Израелскиот премиер Бенјамин Нетанјаху ги отфрли информациите дека САД го убедиле Израел да не ги проширува своите воени активности.

„Израел е суверена нација. Нашите воени одлуки се засноваат на нашите сопствени пресметки“ рече Нетанјаху, пренесе Ројтерс.

Американскиот претседател, Џо Бајден разговараше со Нетанјаху во саботата, објави Белата куќа.

Според канцеларијата на Нетанјаху, израелскиот премиер изразил благодарност до САД за нивната позиција во Советот за безбедност на ОН.

Советот за безбедност на Обединетите нации во петокот усвои омекнат текст на резолуцијата за Појасот Газа, во која се повикува на итно забрзување на испораката на помош за цивилите во палестинската енклава, но испуштајќи го повикот за „итен прекин на непријателствата“ меѓу Израел и Хамас.

Кабинетот на Нетанјаху, исто така, додаде дека тој „јасно ставил до знаење дека Израел ќе ја продолжи војната додека не се исполнат целосно сите цели“.

Според проценките на ОН, речиси 80 отсто од населението на Газа од 2,4 жители е раселено поради борбите.

Многумина од север побегнаа во релативно безбедната зона на југот, но беа зафатени во војната по втор пат.

Израелскиот премиер вети дека војната ќе продолжи се додека Хамас не биде „уништен“, пркосејќи им на зголемените меѓународни повици за прекин на огнот.

Тие сега доаѓаат дури и од блиски сојузници како Велика Британија и Германија, кои се загрижени за цивилните жртви во израелската офанзива.