Израелскиот премиер Бенјамин Нетанјаху денеска изјави дека турскиот претседател Реџеп Таип Ердоган е „последниот кој може да зборува за моралот“, реагирајќи на изјавата на Ердоган дека акциите на Израел против Хамас „не се разликуваат“ од постапките на Адолф Хитлер.

„Ердоган, кој врши геноцид врз Курдите и го држи светскиот рекорд по број на новинари во затвор, е последниот кој може да разговара со нас за моралот“, рече Нетанјаху во изјавата, пренесува „Тајмс оф Израел“.

Тој додаде дека израелската армија е „најморалната армија во светот, која се бори и ја елиминира најодвратната и најбруталната терористичка организација во светот“.

Тој изјави дека Ердоган ги фали и е домаќин на високи претставници на Хамас, „организација која изврши злосторства против човештвото“.

На изјавите на турскиот претседател одговори и Бени Ганц, член на израелскиот воен кабинет, кој рече дека изјавите на Ердоган претставуваат „очигледно искривување на реалноста и сквернавење на сеќавањето на холокаустот“.

Говорејќи на настан во Анкара, Ердоган праша како акциите на Израел се разликуваат од оние на Адолф Хитлер.

„Зборуваа лошо за Хитлер. По што се разликуваат од Хитлер? Нема да нè натераат да го пропуштиме Хитлер. Дали тоа што го прави Нетанјаху е помалку од она што го направи Хитлер? Не е“, рече Ердоган.

Тој додаде дека Нетанјаху „е побогат од Хитлер и добива поддршка од Западот“.

„Секаква поддршка доаѓа од САД. И што направија со сета таа поддршка? Убија повеќе од 20.000 жители на Газа“, рече турскиот претседател.