Во ПАРИЗ денеска се одржува самит за поддршка на Украина, а главна тема ќе бидат безбедносните гаранции во случај на прекин на огнот меѓу Киев и Москва. На состанокот на „коалицијата на волните“ се очекува да учествуваат високи претставници од 31 земја, соопшти кабинетот на францускиот претседател.

Целта на состанокот, кој започнува во 10 часот, е да се финализира повеќеслојната рамка на воени гаранции и помош за Украина, развиена под водство на Франција и Велика Британија. Ќе присуствуваат и генералниот секретар на НАТО Марк Руте и украинскиот претседател Володимир Зеленски.

Според извори во Париз, на самитот ќе стане збор и за дополнителна итна воена помош за Украина и дипломатските напори за постигнување прекин на огнот.

Дискусиите ќе опфатат долгорочни стратегии за зајакнување на воените и одбранбените капацитети на Украина, обезбедувајќи дека земјата може да се спротивстави на идната руска агресија доколку престанат тековните борби.

На состанокот се очекува повторно да се разгледа можноста за распоредување европски сили во Украина. Овие трупи ќе служат како стабилизирачко присуство за зајакнување на прекинот на огнот, наместо да се вклучат во борбени операции, соопшти француското претседателство.

Сепак, повеќе дипломатски извори утрово потврдија за Ројтерс дека ЕУ се оддалечува од испраќање европски сили во Украина.