Најмалку 18 лица се повредени рано утрово во руски напад врз украинскиот пристаништен град Миколаев, соопшти регионалниот гувернер Виталиј Ким, додека властите во Одеса известија за нови напади во регионот.

Во центарот на Миколаев е погодена трикатна станбена зграда, а службите за итни случаи спасија две лица од урнатините, напиша Ким на социјалните мрежи.

Претходно тој информира дека имало убиени, но во следните пораки не даде информации за тоа.

Тензиите околу украинските пристаништа на Црното Море ескалираа откако Русија предупреди дека од денеска бродовите што влегуваат во нив ќе ги смета како потенцијални воени цели.

Москва претходно се повлече од договорот кој обезбедува безбедно поминување на украинските пратки со жито.