Соочен со зголемените антисемитски дејствија во Франција, претседателот Емануел Макрон ги повика своите сонародници да се бранат од „неподносливото обновување на неконтролираниот антисемитизам“.

Франција од која се плашат еврејските сограѓани не е вистинската Франција, напиша тој во отвореното писмо објавено во весникот Le Parisien во саботата навечер.

„Франција во која Французите се плашат поради нивната религија или потекло не е Франција“, се вели во писмото. Во писмото, Макрон предупреди на поделбите во земјата: „Во нашата историја, антисемитизмот отсекогаш бил увертира за друга омраза и расизам“.

Во врска со војната во Газа, Макрон напиша дека Франција сака правда, мир и безбедност за израелскиот народ, палестинскиот народ и земјите од регионот.

Според Макрон, во Франција биле извршени повеќе од 1.000 антисемитски дејствија за еден месец – три пати повеќе акти на омраза кон еврејските граѓани отколку во целата мината година.

Писмото беше објавено непосредно пред големиот митинг против антисемитизмот во Париз во неделата. Макрон не учествува на протестите иницирани од претседателот на Националното собрание Јаел Браун-Пиве и претседателот на Сенатот Жерар Ларше.