Човек од Вирџинија настрадал откако мечка паднала врз него од дрво кога била застрелана од еден од неговите партнери во лов, јавува Асошиетед прес.

Инцидентот се случил на 9 декември во округот Луненбург, кој е помеѓу Ричмонд и Денвил, според соопштението на Одделот за диви животни во Вирџинија. Група ловци следеле мечка која се качила на дрво. Додека ловците се оддалечувале од дрвото, еден од нив ја застрелал мечката.

Животното паднало врз друг ловџија кој стоел на оддалеченост од околу 3 метри од стеблото. Жртвата е идентификувана како 58-годишниот Лестер Ц. Харви од Феникс, Вирџинија. Еден од ловците укажал прва помош пред Харви да биде однесен во болница, каде што починал на 13 декември.