Рускиот министер за надворешни работи, Сергеј Лавров, изјави дека Русија позитивно гледа на можноста за продолжување на преговорите со Украина во Истанбул.

„На можноста за продолжување на преговорите во Истанбул гледаме позитивно“, изјави Лавров, одговарајќи на прашање на агенцијата Анадолија за време на 5. дипломатски форум во Анталија, во врска со изгледите за продолжување на мировните преговори и улогата на Турција како посредник.

Лавров нагласи дека продолжувањето на преговорите во моментов не е „приоритет број еден“ за Москва, додавајќи дека руската страна никогаш не ги наметнувала преговорите.

„Секогаш сме тргнувале од тоа дека ќе бидеме подготвени ако другата страна е волна, и тоа и покрај многу лошите искуства со украинските колеги со кои преговаравме“, рече тој.