Италијанскиот министер за одбрана Гвидо Крозето оцени дека Италија донела „импровизирана и ужасна“ одлука да се приклучи на кинеската иницијатива „Појас и пат“. Според него, таа иницијатива малку придонела за зголемување на италијанскиот извоз, па Кина е единствениот победник.

Пекинг претходно оцени дека двете земји виделе „плодни резултати“ од иницијативата.

Италија е единствената развиена економија која се приклучи на иницијативата „Појас и пат“ за 2019 година, што ја критикуваа нејзините западни сојузници.

Глобалната инвестициска иницијатива „Појас и пат“ предвидува поврзување на Кина и Европа преку повторна изградба на старата трговска рута „Патот на свилата“.

Според иницијативата, Кина обезбедува финансирање на големи инфраструктурни проекти ширум светот настојувајќи да го забрза пристигнувањето на своите стоки на пазарите.

Критичарите ја гледаа кинеската иницијатива како алатка за проширување на влијанието. И ЕУ и САД изразија загриженост кога Италија одлучи да и се приклучи пред четири години.

„Одлуката да се приклучи на новиот „Пат на свилата“ беше импровизиран и ужасен чин, кој го зголеми кинескиот извоз во Италија, а не делуваше исто на италијанскиот извоз во Кина, рече Крозето за италијанскиот весник „Кориере дела сера“.

Министерот рече дека Италија сега треба да работи на тоа како да излезе од иницијативата, а да не ги наруши односите со Пекинг, бидејќи „Кина е конкурент, но и партнер“.

Во Италија од мај се водат дискусии за тоа дали Италија треба да остане во иницијативата „Појас и пат“. Тогаш, премиерката Џорџа Мелони рече дека сака да разговара со Пекинг за можно повлекување од иницијативата.

Доколку Италија не поднесе официјално барање за напуштање на иницијативата „Појас и пат“ до декември, нејзиното членство автоматски ќе се обнови во март 2024 година.