Полицијата го уби возачот на возилото што во понеделникот удри во кинескиот конзулат во Сан Франциско и го оштети фоајето на канцеларијата за визи на зградата, соопшти локалната полиција.

Се’ уште не се познати идентитетот на возачот и неговите мотиви. Во инцидентот нема повредени други лица.

„Не знам колку луѓе имало во канцеларијата за визи во моментот на несреќата“, изјави портпаролката на полицијата во Сан Франциско на брифингот со новинарите неколку часа подоцна.

„Кога полицајците пристигнале на местото на настанот, откриле дека возилото застанало во фоајето на кинескиот конзулат. Полицајците влегле внатре, оствариле контакт со осомничениот и дошло до престрелка“, рече таа.

„Осомничениот подоцна беше прогласен за мртов во болница. Ова е отворена и активна истрага“.

Полицијата ја координира истрагата со истражителите од американскиот Стејт департмент, рече таа, додавајќи: „Не можеме да објавиме повеќе информации во овој момент“.

Кинеската дипломатска служба во Сан Франциско издаде соопштение во кое се вели дека „неидентификувано лице насилно влетало во сала за документи на конзулатот, што претставува сериозна закана за безбедноста на персоналот и луѓето на местото на настанот и предизвикува сериозна штета на објектите и имотот на конзулатот“.

Конзулатот понатаму објави дека „најостро го осудува овој насилен напад и го задржува правото да ја преземе одговорноста за инцидентот“.

Стејт департментот сè уште не одговорил на барањето за коментар за инцидентот.