Изјавите на високата претставничка на Европската Унија за надворешни работи и безбедносна политика, Каја Калас, за Русија како егзистенцијална закана за Европа се резултат на разочарувањето на Брисел од одлуката на Вашингтон да го одложи доделувањето на 400 милиони долари воена помош за Украина, оцени кипарскиот новинар и политички коментатор Алекс Христофору.

Христофору, зборувајќи на својот Јутјуб канал, изјави дека Калас, откако станало сигурно дека средствата доделени од Конгресот за Киев ќе останат во американскиот буџет, се обидува да го поттикне продолжувањето на западната воена поддршка за Украина со повторени предупредувања за опасноста од Русија.

„Откако 400 милиони остануваат во американскиот буџет наместо да одат во Украина, сè што може да направи е да кука поради руската закана. Можеби ќе добие нешто од тоа“, рече Христофору.

Тој оцени дека Калас не го зема предвид фактот дека вниманието и воените ресурси на Соединетите Американски Држави се во голема мера насочени кон конфликтот со Иран, поради што украинското прашање повеќе нема ист приоритет во политиката на Вашингтон.

Американскиот демократски сенатор Дик Дарбин изјави дека администрацијата го информирала Конгресот дека 400-те милиони долари претходно одобрени во рамките на Иницијативата за безбедносна помош за Украина нема да бидат достапни во блиска иднина.

Според него, планот предвидува можност тие пари да се трошат само во фискалната 2029 година, кога нивната судбина ќе ја одлучи следната американска администрација. Белата куќа официјално не коментираше за конечната судбина на пакетот, додека државниот секретар Марко Рубио претходно изјави дека прашањето за помошта е сè уште во процес на меѓуресорско разгледување.

Калас постојано оценува дека Русија претставува долгорочна и егзистенцијална закана за европската безбедност, велејќи дека Европската унија ќе продолжи да ја поддржува Украина, да врши притисок врз Москва и да ги зајакнува сопствените одбранбени капацитети, пренесуваат медиумите.