Јапонија го поздрави привременото примирје меѓу САД и Иран, велејќи дека очекува дека тоа би можело да доведе до конечен мировен договор по разговорите најавени за петок.

Генералниот секретар на јапонската влада Минору Кихара го опиша прекинот на огнот како „позитивен чекор“ и рече дека Токио сака деескалација на конфликтот на терен.

Тој додаде дека премиерката Санае Такаичи планира да разговара со иранскиот претседател Масуд Пезешкијан.

Привременото примирје е особено важно за Јапонија, која увезува околу 90 проценти од својата нафта од Блискиот Исток, главно преку Ормускиот теснец.

Такаичи претходно ја осуди делумната блокада на водниот пат и иранските напади во регионот, но го отфрли барањето на американскиот претседател Доналд Трамп Јапонија да испрати поморски сили за обезбедување на сообраќајот.

Според достапните информации, јапонската премиерка му објаснила на Трамп дека военото учество не е можно поради повоениот устав, кој забранува употреба на сила во меѓународни спорови.