Велика Британија веројатно ќе протера израелски дипломати доколку Израел ја спроведе одлуката од оваа недела за затворање на британскиот конзулат во Источен Ерусалим, според четворица добро упатени извори. Ескалацијата произлегува од спорот околу британските санкции насочени кон израелските населби, пренесува „Ројтерс“.

На 8 септември, Израел ѝ наложи на Британија да го затвори конзулатот во Источен Ерусалим и да ги повлече своите дипломати во рок од 30 дена. Одлуката уследи по најавата на Лондон за забрана на трговијата со стоки произведени во израелските населби на окупираниот Западен Брег.

Рокот од 30 дена истекува во четврток. Според изворите, затворањето директно ќе влијае врз околу 30 британски дипломати кои работат таму, како и врз членовите на нивните семејства. Доколку конзулатот навистина се затвори, Британија веројатно ќе одговори со протерување сличен број израелски дипломати од амбасадата во Лондон, изјавија изворите, кои побараа да останат анонимни.

Изворите не прецизираа колку брзо би можела да реагира Британија. Откако Лондон ги објави санкциите, израелскиот министер за надворешни работи Гидеон Сар ја обвини британската влада за мешање во општите избори во Израел, кои се одржуваат овој месец.

Британското Министерство за надворешни работи не одговори на барањето за коментар, а израелското министерство одби да коментира. Еден израелски функционер накратко изјави дека секоја акција против Израел ќе биде проследена со одговор.

Најавата за британските санкции и израелската реакција ги спуштија односите меѓу двете земји, некогаш блиски сојузници, на многу ниско ниво. Британија постојано го критикуваше Израел за неговите постапки во војната во Газа и за нападите на израелските доселеници врз Палестинците. Од друга страна, израелската влада ја обвинува британската владејачка Лабуристичка партија за непријателски став кон Израел.

Британскиот конзулат, сместен во населбата Шеик Џарах во Источен Ерусалим, е одговорен за односите со Палестинците во градот, на Западниот Брег и во Газа. Таа исто така обезбедува конзуларни услуги за палестинското население. Конзулатот во Ерусалим работи речиси 200 години, многу пред основањето на државата Израел во 1948 година.

Велика Британија, која минатата година ја призна државата Палестина, како причини за санкциите ги наведува проектите за проширување на населбите поддржани од израелската влада, како и сè почестите напади на доселеници врз Палестинците на Западниот Брег.