Италија е подготвена да учествува во евентуална мировна мисија во Украина, изјави италијанскиот министер за одбрана Гидо Крозето, пренесува Анса.

„Се надевам дека ќе разговараме за мир што е можно поскоро, за мировните сили, во Украина, но и во Газа и Либан“, им рече Крозето на новинарите во Мадрид, на прашањето за можноста Рим да испрати мировни сили во Украина.

Францускиот претседател Емануел Макрон ја предложи идејата за испраќање меѓународен контингент во Украина за следење на идниот прекин на огнот. Иако францускиот претседател наводно разговарал за идејата со Обединетото Кралство и Полска, Италија е првата земја која јавно ја изрази својата подготвеност за оваа иницијатива. Подготвени сме да ја играме оваа улога, улога во која секогаш се истакнувавме како нација“, рече Крозето.

Сепак, како што пренесуваат италијанските медиуми, во Италија нема целосно унифициран став по ова прашање. Италијанскиот министер за надворешни работи и вицепремиер Антонио Тајани ги нарече ваквите дискусии предвремени, бидејќи војната со Русија се уште трае.

Обединетото Кралство и Полска јавно изјавија дека во моментов не размислуваат за испраќање свои војници во Украина. Единствено германската министерка за надворешни работи Аналена Баербок изјави дека таквата можност не треба да се исклучи, иако канцеларот Олаф Шолц не го поддржа тој став.

Се очекува европските земји да играат поголема улога во помагањето на Украина да се одбрани и да ја одврати секоја идна руска агресија, бидејќи Трамп најверојатно планира да ја намали вмешаноста на Вашингтон.

За време на разговорите со Макрон и украинскиот претседател Володимир Зеленски во Париз на 7 декември, Трамп наводно им рекол на двајцата лидери дека сака европски мировни сили да го надгледуваат договорот за прекин на огнот во Украина. Зеленски истакна дека Украина „можеби размислува“ за таков чекор, но само откако ќе добие јасна временска рамка за членство во НАТО, на што Трамп и неколку земји-членки се противат.