Австралискиот премиер, Ентони Албанес, ги отфрли тврдењата на милијардерот, Илон Маск, дека неговата лабуристичка влада е фашистичка, велејќи дека американскиот милијардер треба да признае дека „Икс“ (поранешен Твитер) во сопственост на Маск „има општествена одговорност“.

„Ако г-дин Маск не го разбира тоа, тоа кажува повеќе за него отколку за мојата влада“, изјави денеска австралискиот премиер. Тој претходно го нарече Маск „арогантен милијардер кој мисли дека е над законот“, пренесува Гардијан.

Маск претходно го коментираше новиот австралиски закон кој има за цел да се бори против лажните вести што се шират на социјалните мрежи, според кој компаниите како „Икс“ може да бидат казнети со 5 отсто од нивниот годишен промет.

Маск одговори на објавата за мерките на Австралија пишувајќи на „Икс“: „Фашисти“.

Маск се судри со австралиската влада неколку пати во текот на изминатата година, вклучително и барањата од владата „Икс“ да ги отстрани снимките од прободувањето на бискуп во Сиднеј.

Во април, комесарот за е-безбедност му нареди на „Икс“ да ја отстрани содржината и поведе постапка пред федералниот суд за отстранување на материјалот. Во јуни, комесарот за е-безбедност ја суспендираше постапката, но во октомври се очекува да расправа посебен административен апелационен суд за ова прашање.

За време на повеќемесечната сага, Маск ја обвини владата дека ја задушува слободата на говорот.