Претседателката на Европската комисија, Урсула фон дер Лајен во Тирана, каде се одржува Самитот на Берлинскиот процес, изјави дека за Западен Балкан е планиран инвестициски пакет вреден шест милијарди евра, кој, сепак, ќе се инвестира дури откако ќе се спроведат реформите неопходни за пристапување во ЕУ.

На заедничката прес-конференција со германскиот канцелар Олаф Шолц и албанскиот премиер Еди Рама, таа рече дека овие реформи ќе го доближат Западен Балкан до Европската унија, а регионот ќе стане поатрактивен за инвеститорите.

„Предложивме инвестициски пакет вреден шест милијарди евра, кој се состои од две милијарди евра грантови и четири милијарди евра заеми. Сепак, парите ќе се инвестираат дури откако ќе се спроведат реформите. Така што е условен. Работи совршено во Европската унија и верувам дека ќе функционира на Западен Балкан“, рече Фон дер Лајен.