Израел ја обвини Турција за „опасни авантури во Сирија“, додека Анкара повика на прекин на „неодговорните“ израелски напади, два дена откако Израел бомбардираше сириска воздухопловна база за која рече дека требало да биде домаќин на турски трупи.
Нападот ги изнесе на виделина тензиите меѓу регионалните сили Турција и Израел околу Сирија, арапска држава што граничи со двете земји и каде што влијанието на Анкара како сојузник на претседателот Ахмед ал-Шара предизвика загриженост од Израел откако Шара го собори Башар ал-Асад во 2024 година.
Израел тврди дека Дамаск бил блиску до одобрување на распоредување на турски трупи во воздухопловната база Абу ал-Духур и ги игнорирал израелските предупредувања дека таквото распоредување би претставувало закана за безбедноста на Израел. Турција го негираше ова.
Се огласи израелскиот министер за одбрана
Израелскиот министер за одбрана Израел Кац го предупреди турскиот претседател Реџеп Таип Ердоган денеска да не ја тестира решителноста на Израел да се брани, обвинувајќи го турскиот лидер дека ја влече својата земја во „опасни авантури“ во Сирија.
„Ердоган ја влече Турција во опасни авантури во Сирија. Израел нема да дозволи ниту еден актер да ја загрози неговата безбедност. Подобро би било Ердоган да продолжи да држи празни говори против Израел во турскиот парламент, отколку да ја тестира решителноста на Израел да се брани“, рече Кац.
Сириски министер за надворешни работи: Турски воени офицери ја посетија базата
Сирискиот министер за надворешни работи Асад ал-Шаибани изјави за Аксиос дека јасно му ставил до знаење на Израел дека нема планови за воспоставување турска воена база во Абу ал-Духур. Тој додаде дека турски воени офицери ја посетиле базата неколку дена пред нападот, но нагласи дека тоа е дел од „тековната воена соработка во областите на обука и размена на експертиза“.
Турското Министерство за одбрана објави дека немало турска воена делегација во базата ниту пред ниту за време на нападот и дека Турција ќе продолжи да ги поддржува напорите на Сирија во развојот на сопствените воени капацитети и инфраструктура.
