Европската унија ќе го одложи приклучувањето на Украина и Молдавија во тој блок, изјави денеска турскиот претседател Реџеп Таип Ердоган и изјави дека Турција одамна заслужила да стане членка на ЕУ и дека тоа не се случило од „политички причини“.

„Доделувањето кандидатски статус на Украина и Молдавија не значи дека тие ќе станат членки на ЕУ. Процесот ќе започне со нив, но ќе се одложи. Погрешно е што Турција, која е поподготвена за влез во ЕУ од некои земји-членки, со години чека на врата поради политички пречки“, рече Ердоган, пренесе Ројтерс.

Тој посочи дека Турција е кандидат од 2005 година, но се уште не е примена во ЕУ.

Ердоган рече дека „стратешкиот и економскиот“ потенцијал на Турција одамна го заслужи правото да пристапи во ЕУ, што Анкара го наведува како стратешка цел, и додаде дека напредокот во тој процес може да се види за време на претседавањето со Унгарија, со која Турција има добри односи.

Ројтерс наведува дека статусот на Турција е замрзнат поради „состојбата со човековите права во таа земја и несогласувањата околу регионалните политики, пред се во источниот Медитеран и околу островот Кипар“.

Лидерите на ЕУ минатата недела на самитот во Брисел се согласија да ги отворат преговорите со Украина, во време кога таа сè уште води војна против Русија, и истовремено да ги започнат пристапните преговори со Молдавија.

Во рамките на блокот немаше договор за пакет финансиска помош за Украина од 50 милијарди евра поради противењето на Унгарија.