Најмалку 32 делфини угинаа поради излевањето на мазут на руското крајбрежје на Црното Море на 15 декември, соопшти локалната организација за спасување животни, пренесува „Анадолија“.

Центарот за спасување и истражување на делфините Делфа објави дека пронашол 61 мртов кит и делфин од прогласувањето на вонредната состојба. Од нив, 32 делфини умреле најверојатно поради излевање на мазут, додека останатите се верува дека се поврзани со претходни инциденти.

Тие додадоа дека најголемиот дел од смртните случаи се случиле во рок од десет дена од катастрофата и дека жртвите се главно загрозени делфини од Азов.

„За овој временски период, толку голем број на смртни случаи претставува нетипично висока бројка“, соопшти центарот на Телеграм.

Групата предупреди на можно зголемување на бројот на смртни случаи на делфини во следните месеци и најави дека планира да формира болница за долгорочна нега.

„Ова е критично важно бидејќи ќе биде невозможно да се обезбеди помош на делфините директно во плитките води во областите загадени со нафта“, велат од центарот.

Во Русија е прогласена вонредна состојба поради истекување нафта од два танкери оштетени при невреме, што предизвика загадување во некои градови на брегот на Црното Море.

Руските танкери „Волгонефт-212“ и „Волгонефт-239“ беа оштетени на 15 декември поради невреме во теснецот Керч во Црното Море, а евидентирано е истекување нафта од двата танкери.

Се проценува дека од танкерот истекле околу 4.000 тони нафта, додека на чистењето работеле бројни службеници и волонтери.