Десетици луѓе загинаа во тајфунот Јаги, кој ја погоди јужна Кина и Југоисточна Азија и, според „Си-Ен-Ен“, е најсилната бура што ја погоди Азија оваа година.

Откако ги погоди Филипините, тајфунот Јаги се движеше на запад кон јужна Кина и набрзо стигна до Виетнам, Тајланд, Мјанмар и Лаос.

Многу фарми и села во северните делови на Виетнам и соседниот Тајланд остануваат под вода додека локалното население продолжува да се бори со поплавите и заканата од лизгање на земјиштето.

Најмалку 226 лица загинаа во поплавите и одроните во Виетнам, соопшти во четвртокот владината агенција за катастрофи.

Обилните врнежи ја поплавија и северната тајландска провинција Чианг Раи, потопувајќи куќи и села покрај реките, што ги отежна спасувачките напори.

Најмалку 33 лица загинаа во Тајланд во несреќи предизвикани од бура од средината на август, а најмалку девет загинаа оваа недела, објави Ројтерс, цитирајќи ја локалната влада.

Научниците долго време предупредуваат дека бурите стануваат поинтензивни и поубиствени поради затоплувањето на океаните.