Околу 35,8 милиони Аргентинци во недела на гласачките места ќе одлучат дали центристот Серхио Маса или ултралибералниот Хавиер Милеи ќе се обидат да ја извлечат својата земја од длабоката економска криза. Во челуста на најтешката економска криза во последните децении, Аргентинците денес се соочуваат со невозможен избор меѓу двајцата водечки кандидати кои влегоа во вториот круг, бидејќи на 22 октомври ниту еден кандидат не ги освои потребните 45 проценти од гласовите.

Според последните анкети, министерот за економија Серхио Маса, кандидатот на владејачката перонистичка партија во чиј мандат инфлацијата достигна троцифрена бројка и сиромаштијата се разгоре, и слободарскиот но политички аутсајдер Хавиер Милеи се речиси рамномерни. Инаку, гласањето е задолжително во Аргентина.

Избирачките места се отвораат во 8 часот по локално време, а затвораат во 18 часот. Првите резултати се очекуваат во понеделник во раните утрински часови. Самопрогласениот анархо-капиталист Милеи им ветува на гласачите радикален пресврт: тој сака да ја укине централната банка и националната валута и да ги замени со американскиот долар, да укине многу министерства и радикално да ги намали давањата од социјалната политика.

„Никој толку екстремен по економски прашања не е избран да води која било јужноамериканска земја“, рече економистот Марк Вајсброт од американскиот Институт за економски и политички истражувања.

Радикалната програма предложена од Милеи е особено популарна меѓу младите луѓе кои во животот виделе само постојани кризи и се разочарани од политичкиот естаблишмент и сакаат нешто сосема ново. Маса со својата изборна програма ја нуди актуелната политика на голема државна интервенција во економијата и големи давања за социјални програми.