Гласовните актери на видео игрите и изведувачите за снимање на движење го одржаа својот прв протест пред „Варнер Брос“. Актерите во Бурбенк, Калифорнија, предупредуваат дека вештачката интелигенција (ВИ) е закана за нивните професии.

„Моделите што ги користат се обучени на нашиот глас без наша согласност, без никаков надоместок“, изјави за Ројтерс, Лиана Албанезе, гласовна актерка во видео играта Persona 5 Tactica.

Гласовните актери на видео игрите и уметниците за снимање на движење повикаа на штрајк минатата недела поради неуспешните преговори за договор за работа со цел заштита на работниците поврзани со вештачката интелигенција. Ова е последниот штрајк во Холивуд откако синдикалните писатели и актери протестираа минатата година, изразувајќи голема загриженост за вештачката интелигенција.

И Џеф Лич, британски актер во видео играта Call Of Duty: Modern Warfare & Warzone, предупреди на негативните последици од отстранувањето на човечкиот елемент од кој било интерактивен проект, без разлика дали тоа е видео игра или ТВ шоу, анимирана серија, филм.

Одлуката за штрајк следува по повеќемесечните преговори со големите компании за видео игри, вклучувајќи ги Activision Productions, Electronic Arts, Epic Games, Take-Two Interactive, Disney Character Voices и Warner Bros Discovery WB Games.

Штрајкот носи со себе поголем повик за акција низ Холивуд бидејќи луѓето во индустријата се залагаат за законодавство што може да ги заштити од ризиците на вештачката интелигенција.