Во Даблин на Бадник се случи пукање во ресторан, во кое еден млад човек загина, а едно лице е рането и тешко повредено. Нападот се случил во ресторан на главната улица во Бланчардстаун околу 20 часот по локално време, пишува Би-би-си.

По пукањето, двајцата мажи завршиле во болницата „Џејмс Коноли меморијал“, каде што маж на возраст од дваесет години бил прогласен за мртов. „Скај њуз“ пишува дека полицијата истражува дали загинатиот млад човек е напаѓачот.

Друг маж, на возраст од 40 години, се лекува од прострелни рани и е во тешка состојба, соопшти ирската полиција. Во ресторанот ќе се изврши техничко вештачење, а работа ќе има и државниот патолог.

Засега нема уапсени.

РТЕ објави дека пукањето било поврзано со банди и се случило пред гости во ресторанот, вклучително и семејства со деца што јаделе надвор на Бадник.

Shocked to hear about the shooting today in Blanchardstown in a well known family restaurant I’ve visited many times.

Full Garda investigation underway. My thanks to them and solidarity to staff and customers.

— Leo Varadkar (@LeoVaradkar) December 25, 2023

Ирскиот премиер Лео Варадкар изјави дека е шокиран кога слушнал за вооружениот напад во главниот град. Варадкар на „Икс“ објави дека многупати го посетувал тој ресторан.

Ирската министерка за правда, Хелен Мекенти, го осуди пукањето велејќи дека „злобата резултира со незамисливо човечко страдање овој Божиќ“.

„Особено е одвратно што некој може да изврши такво насилство пред семејства“, додаде таа.