Дванаесетгодишно момче, кое важи за најмладиот обвинет во недамнешните немири во Велика Британија, денеска пред судија призна дека извршил насилни дејствија на два антиимигрантски протести во Манчестер, на северот на Англија.

Момчето пред судот во Манчестер призна дека на 31 јули фрлало камења врз автобус пред хотел со мигранти, дека го скршил излогот на продавница за електронски цигари и дека на 3 август фрлил предмет кон полицијата. Казната ќе му биде одредена подоцна без судење, а во меѓувреме ќе остане во притвор.

Енди Престон, градоначалникот на Мидлсброу, каде што се случи насилството, викендов изјави дека „90 отсто од штетата е предизвикана од млади бели Британци кои бараат возбуда и адреналин… без идеолошка мотивација“.

По немирите беа уапсени повеќе од 900 луѓе. Џамиите и засолништата за мигранти беа цел на напади откако на интернет се појавија гласини за потеклото на напаѓачот кој избоде до смрт три девојчиња во Саутпорт на 29 јули.

Премиерот Кир Стармер, сметајќи дека нападите не можат да се оправдаат со политички мотиви, вети решителна и брза реакција од судството.

За некои обвинети веќе се изречени ригорозни затворски казни, вклучително и за објавите на Фејсбук во кои повикуваа на насилство. Читањето на пресудите често се пренесува на телевизија бидејќи власта смета дека тоа ќе ги одврати граѓаните од насилство. Министерката за правда Шабана Махмуд рече дека судскиот систем ќе ги чувствува последиците од неколкудневните немири со месеци и години, имајќи предвид дека од пандемијата затворите се полни, а судовите се преоптоварени.