Во текот на денешниот ден во Националниот центар за спортско стрелаштво во Скопје се одржува Државното универзитетско првенство на Македонија во поединечна конкуренција за студентки и студенти во стрелаштво со воздушна пушка.

Државното првенство го отворија Претседателот на Универзитетската спортска федерација на Македонија и Декан на Факултетот за физичко образование, спорт и здравје, проф. д-р Влатко Неделковски, како и Претседателот на Македонската спортска стрелачка федерација, Јордан Тасевски.

Овој настан традиционално се одржува со години и претставува значаен дел од развојот на универзитетскиот спорт во земјата. Интересот оваа година е особено голем, пред сè од студенти, а се очекува учество на над 400 натпреварувачи, што говори за растечката популарност на стрелаштвото кај младите и студентите и студентките генерално.

Државното првенство е во организација на Македонската спортска стрелачка федерација во соработка со Универзитетската спортска федерација на Македонија и Стрелачки клуб Стрелец Скопје со цел поттикнување на спортскиот дух, натпреварувачката култура и развојот на младите спортисти.
Учеството на 366 студенти на денешниот натпревар од кои мнозинството жени е показател дека спортското стрелаштво е еден од најмасовните поединечни олимписки спортови во Македонија со најголем интерес кај младата популација.

Натпреварот исто така е дел од проектот „Мета на промена: Родова еднаквост во стрелаштвото“ кој што е во соработка со Олимписки комитет на Северна Македонија.
#Co-fundedByEU