Светската антидопинг организација (ВАДА) ќе ја испита пресудата на соодветната тениска организација (ИТИА) во врска со случајот со италијанскиот тенисер Јаник Синер.

ВАДА ја задржа опцијата, доколку е потребно, да го поднесе случајот до Судот за спортска арбитража во Лозана.

Да потсетиме, во соопштението на ИТИА беше објавено дека Синер двапати бил позитивен на нелегалната супстанца клостебол во март 2024 година.

Сепак, ИТИА изјави дека Синер не сноси вина и одговорност за позитивните наоди за допинг бидејќи неговата жалба била прифатена и во двата случаи.

При двете испитувања споменатиот метаболит бил пронајден во мали количини, но поради тоа и двата пати веднаш бил привремено суспендиран, со право на жалба.

Бидејќи жалбата била усвоена и двата пати, тој можеше непречено да продолжи да се натпреварува на турнирите.

Објаснувањето на Синер беше дека член на неговиот тим користел спреј на мала рана на телото во која имало клостебол. Спрејот го купил фитнес тренерот, Уберто Ферара.