Џејмс Родригез некогаш беше голема ѕвезда. По фантастичниот Мундијал во 2014 година, Реал го купи од Монако за 75 милиони евра и уште во првата сезона беше прогласен за најдобар играч за врска на Ла Лига. Во 2015 година, УЕФА го вклучи во најдобриот тим на годината, а подоцна беше одличен во Баерн, каде во 2017 година влезе во најдобриот тим на Бундеслигата.

Сепак, не му оди толку добро во последните години. Во летото 2020 година замина во Евертон како слободен играч, а по една сезона се пресели во катарски Ал Рајан. Тој се врати во Европа во 2022 година како играч на Олимпијакос, но Грците му го раскинаа договорот во април следната година по само 23 одиграни натпревари.

На Џејмс му беа потребни речиси три месеци да најде нов клуб, а на крајот тоа беше Сао Паоло, за кој игра и денес. Ниту во Бразил не игра добро, на 22 натпревари има два гола и четири асистенции.

И покрај слабата форма, тренерот Нестор Лоренцо го повика во репрезентацијата на Колумбија на Копа Америка, а Џејмс таа доверба ја оправда на фантастичен начин. Во финалето Колумбија загуби со 1:0 од Аргентина по продолженијата, но Родригез беше прогласен за најдобар играч на турнирот, постигна еден гол и забележа шест асистенции.

Сао Паоло сега очекува да добие понуди за 33-годишниот Колумбиец, кој би сакал повторно да се обиде во Европа.