Антоан Гризман е најголемиот патриот меѓу фудбалерите, барем во сегментот дека „љубовта се покажува со дела, а не со зборови“.

Во победата на Франција против Холандија од 2:1 во квалификациите за Европското првенство, одличниот напаѓач на Атлетико од Мадрид го одигра 124. натпревар за националниот тим.

Сепак, уште поимпресивно звучи податокот дека за Франција одигра дури 81 натпревар во низа. Од 2017 година тој не пропуштил ниту еден натпревар, вклучително и пријателските за Франција.

Гризман на тој начин го држи рекордот за најмногу одиграни меѓународни натпревари во низа и нема намера да застане.

Во својата репрезентативна кариера го освои Светското првенство во 2018 година и Лигата на нации во 2021 година. Има сребрени медали од Евро 2016 и Светското првенство во 2022 година, а за репрезентацијата постигна 44 гола.