Бразилскиот дефанзивец на Јувентус, Глеисон Бремер (27) ја заврши сезоната поради скинати вкрстени лигаменти. Ова е голем проблем за „старата дама“, а решението за него би можело да се најде во ангажирањето на Серхио Рамос, пишува фудбалскиот портал „Гол“.

Бремер се повреди во шестата минута во победата на Јувентус над Лајпциг (3:2) во второто коло од Лигата на шампионите.

Тој го напушти теренот со помош на физиотерапевт, а дополнителниот преглед покажа и повреда на менискусот.

Бремер пристигна во Јувентус летото 2022 година од Торино за 46,9 милиони евра и веднаш се наметна како еден од најдобрите играчи на Јувентус.

За да се обиде да го ублажи ударот, Јувентус почна да размислува за играчи кои би можеле да го заменат одличниот Бразилец. Меѓу кандидатите, пишува „Тутоспорт“ е и 38-годишниот Серхио Рамос, легенда на шпанската репрезентација и Реал Мадрид, моментално без ангажман.

Досега Рамос одбил понуди од клубови од МЛС, Саудиска Арабија и Бразил.