Раководството на фудбалскиот клуб Евертон се уште го поддржува тренерот Шон Дајч и покрај лошите резултати и елиминацијата од Лига купот, објавија британските медиуми.

Како што пренесува „Скај спортс“, раководството на чело со сопственикот Фархад Мошири, кој неуспешно се обидува да го продаде клубот, во моментов му дава поддршка на тренерот кој в сабота ќе го води тимот на гостински терен против Лестер.

Синоќа, Евертон загуби од Саутемптон на пенали во третото коло од Лига купот, а тимот ги загуби сите четири натпревари во Премиер лигата сезонава. ПОследните два порази, Евертон ги доживеа откако имаше предност од 2:0. Поради тоа незадоволните навивачи бараат промени.

„Скај спортс“, објави дека пред поразите од Астон Вила и Саутемптон, Дајч имал „доволно кредит кај сопственикот“, откако во претходните две сезони успеа да обезбеди опстанок во Премиер лигата. Договорот на Дајч со клубот важи до крајот на сезоната.