На членовите на Демократската унија за интеграции им е многу јасно дека утре не може ништо да се случи со Законот за јазиците во Уставниот суд, оти тие ги бираа судиите и никој не можеше да биде уставен судија или каков било судија без да помине филтер низ нивните структури, рече денес премиерот Христијан Мицкоски. Тој уверува дека ситуацијата е под контрола и дека утре нема да се случи ништо оти се работи за процес кој може да трае со месеци или години и ги повика граѓаните да не дозволат да бидат злоупотребени.

„Тие точно знаат дека за да дојдеме до конечно решение, какво и да е, не е важно, најпрвин имаме тој кој што е за овој случај надлежен судија да го репортира, да им објасни на своите колеги, па јавна дискусија, јавна расправа, па подготвителна седницата така што тоа е процес кој ќе трае со месеци можеби и со години. Нивната цел беше сега, како политички глодари, да начекаат и да видат, еве сега знаеме како одат процедурите, ние ќе правиме политички притисок и кога нема ништо утре да се случи да излезат во јавноста, нормално тоа може само политички глодари да го прават, да излезат и да кажат еве поради тоа што ние правевме притисок се одложи сето ова. Не функционираат така работите, а на нив им е многу јасно како функционираат работите. Затоа  ги молам, уште еднаш, нашите сограѓани Албанци, Македонци сите, да бидат смирени. Целата работа е под контрола, да не дозволиме да наседнуваме на провокациите на овие луѓе. Не е потребно. Тие луѓе завршија, на 8 мај беа поразени, имаме нова Влада која точно знае што прави и кои чекори ги презема. Ве молам за смиреност немојте да дозволите да бидете злоупотребени. Ништо нема да се случи утре, целата ситуација е под контрола. Тоа сакам да го испратам како порака“, вели премиерот Мицкоски.

Активисти на ДУИ во неделата се собраа пред Уставниот суд и поставија „стража за јазикот“ со најава дека ќе останат таму се до утрешната седница на која ќе се расправа за Законот за употреба на јазиците.