Според СДСМ, Христијан Мицкоски ги призна луксузните патувања, скапите карти од 20.000 евра и бизнис класите платени со пари на граѓаните.

Но, во исто време, како што додаваат од оваа партија, Мицкоски лаже и ја потценува интелигенцијата на граѓаните. Особено кога, како што велат, без око да му трепне вели дека причина за тоа биле проблеми со колената.

„Дали Муцунски, Тошковски и Мисајловски исто така имаат проблем со колената? Па затоа мора и тие да патуваат со бизнис класа?

Зошто молчеше и се криеше со денови откако СДСМ го откри јавно скандалот со луксузните патувања?

Ќе ги објави ли сега Владата сите трошоци кои ги платија граѓаните за луксузните прошетки на Мицкоски и неговите министри?

Наместо да води грижа за секој денар, за тоа како да се трошат парите, Мицкоски дрско, дури и безобразно мува не го лази за начинот на којшто се расфрла и се луксузира на државен трошок“, се истакнува во реакцијата на СДСМ.

Ова, според опозициската партија, ја покажува ароганцијата и потценувањето на граѓаните но и начинот на којшто ВМРО-ДПМНЕ и Мицкоски ќе се однесуваат, душмански со парите на граѓаните, за сопствени луксузирања.