Центарот за јавно здравје Тетово прогласи епидемија на територијата на Општина Гостивар поради наглото зголемување на бројот на заболени со гастроентеритис и надминување на лимитот на неделно ниво.

Како што соопшти епидемиологот д-р Зорица Зафироска, во последните 24 часа на Инфективното одделение во гостиварската болница се прегледани 204 пациенти, од кои тројца се хоспитализирани, додека на Педијатрија се евидентирани 140 прегледи, од кои 105 нови случаи.

Причинителот и изворот на заразата сè уште не се утврдени. Во тек се микробиолошки анализи на примероци од пациенти и од водата, кои ги спроведуваат Центарот за јавно здравје и Институтот за јавно здравје, додека Обвинителството очекува резултати од испитувањето на водата во текот на утрешниот ден.

Паралелно, Владата донесе одлука интервентно да обезбедува по 50.000 литри бесплатна вода за пиење дневно за граѓаните на Гостивар, а Министерството за здравство апелира граѓаните да ги следат препораките на надлежните институции и при симптоми како повраќање, дијареја или знаци на дехидратација веднаш да побараат лекарска помош.