Заканите дека ќе го блокираат законот за бранителите и ќе бараат тој да се носи во пакет со решение за статусот на војниците од поранешната УЧК, за премиерот Христијан Мицкоси се обид повторно да се создадат етнички тензии и нетрпеливост оти само на таа карта знае да игра опозицијата. Тој и денес кажа дека ги поддржува бранителите и ги повика граѓаните да не наседнуваат на провокациите.
„Бранителите на ја имале, ја имаат и ќе ја имаат мојата недвосмислена поддршка. Овој закон, кој вчера беше на дневен ред, е поднесен од пратеничката Славјанка Петровска, односно од СДСМ, и она што е интересно кога се гласаше потребата за носење на дневниот ред, СДСМ ја напушти седницата. Ова го споменувам затоа што самата пратеничка и СДСМ не го поднесуваат законот затоа што мислат добро на бранителите туку го поднесуваат за да создадат еве ваква состојба, за да создадат повторно етнички тензии, да создадат етничка нетрпеливост бидејќи таа ќе е картата на која и тие и другите опозициски партии, без разлика дали се од македонскиот или од албанскиот блок, ќе играат во периодот што следи. Мојот совет до граѓаните е да не наседнуваат на ова затоа што состојбата е стабилна“, рече премиерот Мицкоски денес на отворањето на спортскиот комплекс „Бранители“ во Општина Бутел.
Според него на опозицијата и пречи дека се она што е потребно за да се развива државата веќе се случува, односно расте индустриското производство, расте преработувачката индустрија, инфлацијата се намалува, инвестициите почнуваат, растат пензиите, се враќаат субвенциите на земјоделците.
Премиерот потсети дека СДСМ и ДУИ имале седум години да го решат прашањето на бранителите со кое сега креваат тензија.
„Тие не знаат како да ја кренат економијата или да дадат предлог, тие не знаат како да изградат, не знаат како да направат нешто добро, но се мајстори за создавање на вакви тензии. Тоа ќе се случува во периодот што следи, но ние сме држава, ќе се браниме и ќе ги одбраните граѓаните и безбедноста на Македонија. Речица и Бихаќска имаа можност седум години да разговараат на оваа тема. Не можат поинаку да мобилизираат луѓе затоа што голтари влегоа во политиката, милионери излегуваат. Од команданти излегуваат милионери. Тоа е суштината овие 20 години“, рече премиерот Мицкоски.
Пратениците од „Вреди“ вчера ја напуштија седницата со објаснување дека тие се во Собранието за да го бранат правото на албанскиот народ и да бараат сеопфатни решение за сите рани од минатото, вклучително и статусот на поранешните борци на УЧК. Најавија дека нема да дозволат усвојување на законот за бранителите доколку со него не се реши и статусот на војниците на војниците на поранешна УЧК.
