Агенцијата за храна и ветеринарство на 21 септември оваа година во Македонија дозволила увоз на околу 20 тони трајно млеко од Република Србија, обвинува опозицијата.

Од ВМРО-ДПМНЕ во соопштение пишуваат:
„ Ни помалку, ни повеќе во млекото пуштено во промет е детектиран афлатоксин М1 над максималното дозволено ниво. Оттука ова млеко е штетно за пиење, а истото предизвикува труење и други компликации по здравјето на граѓаните. Ова се темели на докази, односно ова е резултат од лабораториски анализи. Има информации дека во сурово млеко во една од поголемите млекари во Македонија исто така е детектиран афлатоксин М1 во млекото. Во истото се надминати максимално дозволените нивоа согласно Правилникот за општите барања за безбедност на храната.“

Вчера од АХВ информираа дека млеко со афлатоксин по потекло од Србија на полиците во маркетите нема.

„Денес, со согласност на извозникот, од граница тоа се враќа во Република Србија во согласност со законски дефинираните процедури“, рекоа од Агенцијата за храна и ветеринарство.