Претседателката Гордана Сиљановска-Давкова, премиерот Христијан Мицкоски и претседателот на Собранието, Африм Гаши, упатија честитки до граѓаните од исламска вероисповед по повод големиот муслимански празник Курбан бајрам.
Сиљановска-Давкова упати честитка до поглаварот на Исламската верска заедница, реис-ул-улема х. хфз. Шаќир еф. Фетаи, членовите на Ријасетот, муфтиите, имамите и до сите верници, посакувајќи им празникот да го поминат во мир, радост и семејна благосостојба.
„Во свет обременет со неизвесност, недоверба, отуѓеност и ослабено чувство на заедничка припадност, големите празници имаат силна духовна димензија и моќ“, се вели во честитката од претседателката.
Таа потенцираше дека Курбан бајрам, преку симболиката на дарување и пожртвуваност, упатува на вредности важни за моралната зрелост на заедницата – човечноста, емпатијата, солидарноста и одговорноста кон другиот, нагласувајќи дека само преку разбирање, заемно уважување и култура на почит, различностите можат да бидат предност и да прераснат во единство.
Претседателот на Владата, Христијан Мицкоски, во својата честитка до верниците и нивните семејства упати желби за добро здравје, мир, спокој и благосостојба во секој дом.
„Курбан Бајрам нѐ потсетува на вредностите на солидарноста, човечноста, меѓусебната почит и грижата за ближните. Во духот на празникот, да продолжиме заеднички да градиме општество на разбирање, единство и почитување, каде различностите се наша сила, а заедништвото наша иднина“, порача Мицкоски.
Честитки по повод празникот упати и претседателот на Собранието, Африм Гаши. Тој до граѓаните од исламска вероисповед и нивните семејства пренесе желби за здравје, мир, спокој и благосостојба.
„Овој свет празник нè потсетува на важноста од грижата едни кон други, споделувањето на добрината со семејството, соседите и со сите оние на кои им е потребна поддршка и човечка топлина. Курбан Бајрам е исто така повик за поголемо единство, мир и хармонија во нашето општество, зацврстувајќи ја вербата дека само заедно можеме да изградиме подобра иднина за сите граѓани“, порача Гаши.
