„Факт е дека се работи на квантитет, а не на квалитет. Факт е дека создаваме необразовани генерации и тоа мора да се искорени. Студентите се нашата иднина. Ќе им ги дадеме сите можности да студираат бесплатно, а не да плаќаат. Да имаат можност да студираат во странство на сите врвни универзитети. Да можат да останат овде во Македонија. Првенствено, нашата основна цел е да се вратиме на темелите на нашата државност, тоа што постојано го газат. Ќе работиме да изградиме држава во која право и правда ќе има за сите, а правата на сите граѓани ќе се почитуваат подеднакво, почнувајќи од најмладите, па се до пензионерите. Ќе работиме да изградиме држава која ќе ги задржи младите дома. Ние знаеме како и заедно со вас граѓаните, „Знам“ дека ќе успееме”, порача градоначалникот и идеен творец на „Движењето Знам – За наша Македонија“, Максим Димитриевски на вчерашното потпишување на Иницијативата.
Мототo на партијата која во следниот период и правно формално ќе биде формирана, по собирање на потребните потписи е „Од граѓаните за граѓаните“, а основна цел ќе биде да ги обедини граѓаните и да ја врати земјата на вистинскиот пат.
Пред присутните се обрати и Мила Петрушевска како претставник на младите и борец за студентските права, која посочи дека во изминатиот период во заедничката борба со студентите за подобар студентски стандард, била сведок на многу лажни ветувања и празни зборови без конкретни дела, што било мотив и волја да се приклучи на движењето ЗНАМ, верувајќи дека ќе биде водечки на политичката сцена за промени во нашето општество.
„Такво искуство имам од средбите во Собранието и во МОН каде што често пати после милозвучните зборови на функционерите, забораваа на нашите потреби во истиот момент откако ќе излезевме. На кратко кажано – служевме само за нивна ПР стратегија во јавноста како тоа се грижат за младите, а всушност во реалност – младите се повеќе и повеќе масовно се иселуваат. Младите се иселуваат поради тоа што веќе не можеме да се пофалиме со квалитетно образование, младите се иселуваат бидејќи немаат ни хумани услови за сместување и седење во студентските домови, младите се иселуваат поради тоа што за успех се смета покачувањето на студентскиот оброк за цели 20 денари, се иселуваат поради тоа што предиспозиции за успех се сметаат дали некој е член на партија или син/ќерка на некој што е носител на јавна функција”, истакна Петрушевска.
Македонија нема време за чекање, а иднината е во рацете на младите. Кога кај тие што ја водат државата не постои политичка волја за решавање на реалните проблеми на своите граѓани, на идните генерации им останува да го плаќаат долгот од нивното неработење, дополни таа, порачувајќи дека токму младите од „Движењето Знам“ ќе им покажат дека се првата авангардна сила на браникот на државата.
