Синдикатот на вработените во органите на државната управа, правосудните органи и здруженијата на граѓани (УПОЗ) е апсолутно незадоволен од одлуката на Владата минималната плата да се зголеми за 1800 денари, рече денес претседателот на Синдикатот, Трпе Деаноски. Синдикатот на УПОЗ и Сојузот на синдикати на Македонија (ССМ) остануваат на барањето минималната плата да биде 500 евра.
„Првпат откога е воведена минимална плата во 2012 година за минимална плата се одлучи без работниците. Имавме ние парола пред неколку години на Први мај ‘Не смее да се одлучува за работниците без работните’ а за жал Владата вчера на седница си донесе износ на минимална плата од 1800 и не знам точно колку денари. Се донесе без Економско – социјалниот совет да разговара за таа минимална плата, без да одлучат и работодавачите и работниците и Владата за таа плата. Првпат се случува ова меѓутоа имајќи предвид во каква држава живееме нема да биде ни последен пат. Апсолутно сме незадоволни од ваквата одлука на Владата, ги знаете нашите барања, од тоа не отстапуваме“, рече претседателот на Синдикатот на УПОЗ, Деаноски.
Изјавите дека Владата ќе дозволи за износото на мнималната плата да се договорат работодавачите и синдикатите, Деаноски ги смета за небулозни.
„ Јас сакам да ја потсетам Владата дека таа е најголемиот работодавач во државата. Во државата се вработени 129 илјади работници во јавниот сектор од кои минимум 25 илјади директно зависат од усогласувањето на минималната плата. Тоа значи дека ова не е покачување на плата. Ова е само усогласување што треба да го добијат сите работници во државата. За првпат Владата сама си донесе одлука. Ние не сме репрезентативни, кажа и премиерот дека додека немаме репрезентативност ние не можеме да учествуваме на Економско – социјалниот совет. Изгледа на Владата толку добро и оди што може да си носи одлуки без синдикатите и без работниците, за жал“, вели Деаноски.
Какви чекори ќе преземат синдикатите по одлуката на Владата Деаноски најави дека ќе одлучуваат в петок кога е закажана седница на претседателството на ССМ, а в петок е закажана и седница на Комсијатза репрезентативност која треба да одлучи дали ССМ, каде што членива и Синдикатот на УПОЗ, се репрезентативни претставници на работниците.
