Филмовите „The Brutalist“ и „Emilia Pérez“ и серијата „Shōgun“ доминираа на синоќешните Златни глобуси, што го означува неофицијалниот почеток на овогодинешната сезона на награди.

Нискобуџетниот еп „The Brutalist“, драма што ја раскажува приказната за архитект кој го преживеал Холокаустот, освои три награди: најдобар филм во категоријата драма, најдобар актер (Адриен Броди) и најдобар режисер (Брејди Корбет). На крајот од својот говор, Корбет му оддаде почит на режисерот Џеф Баена, кој почина неодамна.

Криминалистичкиот мјузикл на Нетфликс „Emilia Pérez“ беше најноминираниот филм на вечерта и доби четири награди, вклучително и најдобар филм – мјузикл или комедија, споредна женска улога за Зои Салдања, оригинална песна и филм кој не е на англиски јазик.

Салдања ги победи своите колешки Селена Гомез и Аријана Гранде.

Имаше и изненадување за најдобра актерка во категоријата драма, а бразилската ѕвезда Фернанда Торес ги победи Никол Кидман, Анџелина Џоли и Кејт Винслет за нејзината улога во драмата од 1970-тите. Наградата и ја посвети на мајка си.

Деми Мур ја доби наградата за најдобра актерка во мјузикл или комедија за „The Substance“.

„Навистина не го очекував тоа“, рече таа пред да додаде дека никогаш претходно не освоила ништо. Таа раскажа возбудлива приказна за недостатокот на самодоверба што го претрпела бидејќи не ја сфаќале сериозно.

Себастијан Стен ја загуби наградата за најдобар актер во драма, но доби Златен глобус за најдобар актер во мјузикл или комедија за „A Different Man“.

Историскиот еп „Shōgun“ доминираше во категориите на ТВ-драма, додека хитот „Baby Reindeer“ освои две награди.

Иако „Wicked“ беше исклучен од главните категории, му беше врачена наградата за филмско и бокс-офис достигнување, категорија создадена минатата година, а која за прв пат ја освои „Barbie“.