Актерот Брајан Кренстон се прости од Ар-Џеј Мите (RJ Mitte), неговиот колега од серијата „Breaking Bad“ кој го играше неговиот син. Кренстон изјави дека чувствува длабока тага по веста за смртта на Мите.

Тој објави нивна заедничка фотографија на социјалните мрежи со порака: „Вечерва пишувам со длабока тага. Ар-Џеј Мите, мојот драг син од ’Breaking Bad‘, почина.“

Кренстон се присети како го запознал Мите кога тој имал 14 години. Ја истакна неговата решителност да живее со церебрална парализа и напиша како тој се развил од тинејџер на сетот во талентиран актер и борец за правата на лицата со попреченост. „Тој беше една од ѕвездите на хит-серијата, но во душата сепак беше дете“, додаде Кренстон.

Тој наведе дека се слушнале пред само неколку недели и планирале ручек, додавајќи дека го боли сознанието оти тоа никогаш нема да се случи. Ја заврши објавата со зборовите: „Сè што знам е дека го сакав… Ќе ми недостигаш, сине.“

Мите, најпознат по улогата на Волтер Вајт Џуниор во серијата „Breaking Bad“, почина на 34-годишна возраст. Извори потврдија за TMZ дека станува збор за самоубиство, а надлежните органи сè уште ги истражуваат околностите на смртта.

Покрај глумата, Мите беше познат и како активист за правата на изведувачите со попреченост. Тој го користеше јавниот простор за да промовира поголема видливост и инклузија во филмската и телевизиската индустрија.